كلمات من تجربتي الخاصة || بقلم: سندس حمدان المصري ، السادس على قطاع غزة، والعاشر على فلسطين في االثانوية العامة

الجمعة 29 مايو 2020

كلمات من تجربتي الخاصة || بقلم: سندس حمدان المصري ، السادس على قطاع غزة، والعاشر على فلسطين في االثانوية العامة

عن كمية السعآدة إلي بتغمرني لمآ حدا يبعتلي ويحكيلي إنتي قدوة إلنا وحآبين نصير متلك، لأن بحس دعوآتي بتستجاب، كنت دايماً أدعي يا رب أكون خير قدوة، 
بالنسبة ل كيف كان جدولك وروتينك اليومي، 
راح أحكي ????????
أنا هأحكي تجربتي الخاصة وكل واحد هيكون إلو تجربة معينة ورأي خاص فيه، 
أنا كسندس ما كان إلي جدول معين وجدول واحد ما كنت متل الناس التانيين أكتب ساعة أكل وساعة نوم وساعة راحة وساعتين دراسة ومن هالكلام... ، لآ صراحة ما كنت هيك. 
راح أحكي جدولي بالتفصيل، 
من بداية التوجيهي وقبل التوجيهي بعدة أيام طالما عقدت النية وتوكلت عالله وحطيت الهدف هيّأت نفسي قبل م تبدأ المدرسة إنو أصير أنام بدري، وكنت من أول أيام التوجيهي وللاخر، أصحى على موعد اذان الفجر، لازم أصحى كده لو صحيت عموعد المدرسة بسرعة بحس نفسي متنكدة وفي شئ ناقص ! 
طبعاً بتصلوا الفجر بتدعوآ بعد الصلاة بكل شئ بدكم ياه بكل شئ لأن إنتو بتتعاملوا مع رب كريم يا سادة ! 
طبعا لازم تقرأوا الأذكار أهم شئ باليوم، بعدين كنت أنظر نظرة سريعة جداً عن شو بدنا ناخد خلال اليوم، 


بعدين جهزوا أنفسكم للمدرسة بروح حلوة وكلها تفاؤل وما تنكدوا عحالكم أبداً أبداً، لازم تروحوا المدرسة وإنتو متفائلين عشان يكون يومكم لطيف وحلو، ركزوا جدا جدا بالدوام وما تلتهوا، ممكن تحكي الأبلة أي معلومة وما تنتبهي إلها وتتفاجئي تلاقيها بالامتحان ! انتبهوا 
جداً. 
طبعاً انتهى الدوام بعدهآ ما تهكلوا هم مراجعة الحصص يلي أخدتوها بالعكس، حطوا ببالكم شعور إيجابي إنو هنروح ننام ساعتين نرتاح وأراجعهم كلهم وكل اشي أخدناه سهل وهيك، قد متقدروا فكروا بإشي إيجابي فقط ! 
طبعاً بالنسبة إلي كنت آخد درس إنجليزي عند الأستاذ الفخم الموسوعة الأستاذ محمد صقر، فطبيعي كنت أروّح من المدرسة لازم أرتاح ساعة ونص او ساعتين نوم وأصلي وآكل أكيد أهم شئ ????، بعدها كنت أروح عدرس الإنجليزي، كنت أستنى الساعة الي أروح فيها عالأستاذ كنت دايما متحمسة، كانت لما تخلص الحصة أحكي ليش خلصت بدري ! والبنات يبهدلوني ويحكوا طوّلت الحصة ههههه. 
بعد ما أروّح من الحصة كآن يبدأ يومي .. 
كنت أقعد عمكتبي وأمسك دفتري وأكتب بالخطوات شو عليّ دراسة يالضبط وشو عندي مراجعة، أكتب كل إشي بدي أعمله مشان ما أكون تايهة .. 
كنت كل خطوة أنتهي منها أشطب عليها بالقلم وأشجع نفسي بنفسي طبعاً، أضل أحكي بعقلي وأكتب قبالي قادرة تخلصيهم وانتي قدها وابصر شو كده يعني هههه

 
ولما أخلص كل إشي وقتها بحس بإنجاز عظيم جداً بعدها بدّلع نفسي، لأنو حقهآ 
اذا في وقت كنت أطلع ونحكي انا وخواتي كنت اكتب شغلات وأعلقهم عالحيط قبالي ! 
كنت أحضر لليوم التاني واذا كان في كويز كنت أدرسلوا، 
ويوم بعد يوم ويوم بعد يوم هتحسوا الأيام مرّت بسرعة وغمض عينك وفتّحها هتلاقي نفسك قاعد عكرسي وقدامك الهوية والاستمارة ! 
هاد جدولي ببداية التوجيهي كان كده، بس تصلوا فترة الامتحانات النصفية والنهائي الفصل الأول وفترة اجازة الاسبوعين كل الجدول بيتغير لكن كل شئ بوقتو حلو، 
بتمنى إنكم ما تستسلموا بتمنى تستغلوا الفرصة هادي وتحققوا أحلامكم وآمال أهاليكم، عنجد يجماعة بترجاكم إستغلوها صح ????????، 
أي سؤال خارج إطار الجدول والروتين إبعتولي ياه وراح أجاوبكم،
عفكرة، النجاح سهل آه سهل ! 
لكن التفوق والصبر والتميز هاد مش سهل بدها شدّة حيل بدها عقل يفكر ونفس تصبر وعقل يحفظ ويفهم بدها شخص قوي قد المسؤولية، 
الله يجعل التفوق حليفكم،

 


 
عشان أكون صريحة معكم، في إشي عظيم جداً كان كتير مصبرني عفترات اليأس إلي مريت فيهآ، كنت لما أضعف ألجأ الى الله سبحانه، ثم الى مقطع الفيديو ال 8 دقائق كانوا كفيلين يرجعوني متحمسة جداً، كنت أسمع الفيديو هاد وأسرع عالكتب والملازم والدفاتر وأنهي كل إشي عليّ، كنت دائما أسمعو وأحيانا باليوم أكتر من مرة ! 
الفيديو للشيخ نبيل العوضي بعنوان غيّر حياتك وحقق أحلامك.. " راح أرفق صورته ". 
كنت معلقة ورقة قدام عيني وحطاها عالحيط فيها" سندس هتجيبها من أوائل الوطن إذا الله أراد، سندس هتكون قدها، سندس مش هتضعف" 
لكن أنا إنسانة متلي متل غيري كتير كنت أضعف وأستسلم لكن بعد الضعف أرجع بقوة أكبر من قبل، كنت أسمع هالفيديو يلي فيه بيحكي فضيلة الشيخ نبيل العوضي، 
من بعض كلماته.. إذا قالوا لك أين تريد أن تصل بالطريق قل أريد القمة ! 
انا ما أرضى بالوسط، أنا ما أرضى بالدون، أنا لن أقبل الا بالقمة ! 
طبعا وهادي الكلمات المعروفة.. 
ومن يتهيب صعود الجبال يعش أبد الدهر بين الحفر، 
يجماعة فش وصول للقمة بدون جهد وعمل، عنجد ! 
مش ممكن تصل للقمة وإنت كسلان ونايم، مستحيل، بدها جهد بدها تعب بدها قوة وانت قدها.


يعني عنجد انا بستغرب كمان من إنسان يريد القمة ووقته ضايع ووقته مقضيه عالإنستا والفيس! 
من يرد القمة عليه بالعمل والاجتهاد وعليه أن يتحكم بنفسه وينظم وقته. 
يعني كمان إلي متعود عالأغاني وإلي بضيع الصلاة أو بأخرها هاد عنجد مستحيل يصل للقمة وكمان مش هيقدر يتجاوز خطوة باتجاه الهدف ! 
إلي قلبه متعلق بالاغاني والذنوب مش هيصل للقمة أبداً، ف بتمنى الكل يفهم نفسه من هلقيت ويمشي بخطوات صحيحة باتجاه الهدف، 
جددوا النية وانتو قدها.
توجيهي 2020، 
كن عِصامياً، إعتمدوا عنفسكم بعد التوكل على الله، ما تستمعوا للناس المحبطين لا تقول فلان ولا تهتم لحد، 
أنت اذا أردت أن تصل تستطيع أن تصل ولو لوحدك. 
فش وقت للراحة والكسل والنوم، إجا وقت التعب والدراسة والجهد وتحقيق الهدف، 
دايماً إحكوا اللهم إني أعوذ بك من العجز والكسل.  
معقول في ناس بتابعني وعندهم نفس حماسي وهمة عالية !؟ ???? " بتمنى صراحة" 
 والله لو دارت بك السنين ! عندك همة ومتوكل على الله وبتجتهد مصيرك هيكون الوصول والفرحة إن شاء الله .
عندك همة ! بسرعة حط هدف، ما تعيشوا سبهللة ! لازم تعرف نفسك انت وين ووين هتروح، 


توجيهي 2020 طوّلت عليكم هههه بس هأحكي آخر شئ إلكم ????????، 
إذا أردت أن تصل ستصل إن شاء الله، وما نيل المطالب بالتمني ولكن تؤخذ الدنيا غلابا، وما إستعصى على قوم مثال اذا الاقدام كان لهم ركابا، 
إذا عزمت فتوكل على الله! 
طريقكم الى القمة شاق، نعم شاق ! 
لكنه لذيذ وممتع وإذا وصلت فهنالك الراحة والسعادة، 
إستعن بالله عز وجل ولا تعجز وأبدأ من الآن. 
شكرا لكل حدا قرأ الكلام، أسأل الله لي ولكم التوفيق، 
محتاجة كمان تدعولي ????


#سندس_حمدان_المصري. 
تخرجت من التوجيهي بمعدل 98.7% بترتيب العاشر على فلسطين والسادس على قطاع غزة، "القسم الأدبي".